Forretningsmodellinnovasjon kan restrukturere olje- og gassindustrien

Verda står ovanfor store utfordringar knytt til global oppvarming og klimaendringar. Hastverket med energiomstillinga er knytt til at vi risikerer å krysse kritiske vippepunkt for uopprettelege klimaendringar grunna aukande utslepp. Det trengst berekraftige måtar å drive verksemd på, og då særleg i olje og gass- industrien, ettersom denne industrien sine bidrag til klimaendringane gjer energiomstillinga naudsynt.

Omstrukturering og forretningsmodellinnovasjon
Parisavtalen har som mål å sikre at alle land bidreg til å redusere klimaendringar og drivhusgassar, der kvar involverte nasjon skapar ein nasjonal plan for å redusere sine drivhusutslepp. Omstruktureringa av den norske olje-og gassindustrien har fått stor merksemd grunna behovet for berekraftig omstilling for å nå desse klimaambisjonane nedfelt i Parisavtalen. Sameleis er EU Taxonomy Regulation utvikla for å møte klima- og energimåla til EU i 2030 og for å nå måla i den europeiske grøne avtalen. Dette tvingar fram ei omstrukturering innan olje og gass- industrien der dei fleste selskap fokuserer på å utvikle nye teknologiar og gjere prosessar mindre miljøskadelege, men vier forsvinnande lite merksemd til forretningsmodellinnovasjon. Det er eit tankekors ettersom forretningsmodellinnovasjon kan bidra til omstrukturering ved å hjelpe selskap med å tilpasse seg endra marknadstilhøve og oppnå konkurransefortrinn.

Forretningsmodellinnovasjon
Innovasjon er eit middel til økonomisk vekst, berekraftig utvikling, teknologisk utvikling og industriell omstrukturering og eit sentralt element mot den berekraftige omstruktureringa av den norske olje- og gassindustrien. For å lukkast må organisasjonar endre meir enn berre produkta og tenestene sine. Forretningsmodellinnovasjon kan vere avgjerande i ein vellukka omstruktureringsprosess, gjennom at fleire områder inkludert kundar, tilbod, infrastruktur og finans. Endring her vil styrke deira strategiske posisjon. Forretningsmodellinnovasjon inneber å gjere samtidige endringar i verdiforslag og underliggande driftsmodell til organisasjonen – for å skaffe seg ein strategisk konkurransefordel. Firma kan utforske nye innovasjonar som følgje av tilpassing av noverande forretningsinnovasjonsmodell mot ein bestemt arketype, med premiss om at endringar i forretningsmodellar er avgjerande for å mogleggjere berekraftige innovasjonar. Dømer på forretningsmodellinnovasjon i olje- og gassindustrien kan vere å endre forretningsmodellen frå å vere ei tradisjonell olje- og gassprodusent til å bli ei meir heilskapleg energiprodusent. Dette kan innebere å investere i fornybar energi, sol- og vindkraft samt utvikling av teknologi for karbonfangst og lagring. Forretningsmodellinnovasjon kan også innebere å skifte frå å selge produkt til å tilby tenester, som til dømes vedlikehald og reparasjon av utstyr samt å tilby teknologiske løysingar som overvaking av produksjonsprosessar.

Dominerande tankesett hindrar omstilling
Men sjølv om det moderne energisystemet er identifisert som hovudårsaka til problemet og nødvendigvis løysingspunktet, viser involverte aktørar seg motstandsdyktige mot endring. I ein nyleg publisert studie, undersøkte Silje Sletten, Katrine Wangen Jonasmo og eg kva måtar forretningsmodellinnovasjon kan på avgjerande måtar bidra til omstrukturering i den norske olje- og gassindustrien. Industriell omstrukturering krev at verksemdene gjer fleire endringar i ulike element av verksemda samstundes – for å posisjonere seg i ein ny marknad eller ein ny bransje, noko som krev forretningsmodellinnovasjon. Vi fann at medan olje- og gasselskap kan ha tilstrekkeleg kompetanse og erfaring med å utvikle nye teknologiar, er prosessen med å innovere fleire aspekt av organisasjonen samstundes ukjend for dei fleste, trass i at nettopp det er avgjerande for suksess. Sektoren krev nye forretningsmodellar, rasjonalisert portefølje, akselererte investeringar i digitale teknologiar og større kapitalfleksibilitet, skriv EY. I tråd med dette såg vi i studien at selskapa sine kundesegment, verdiaukingar, nøkkelressursar, nøkkelpartnarar samt kostnadsstruktur må endrast for å lukkast med den industrielle omstruktureringa. Det er fleire eksterne utfordringar som olje- og gasselskap står overfor som kan påverke forretningsmodellinnovasjon.  Ved å starte forretningsmodellinnovasjon kan olje- og gasselskap tilpasse seg endringar i marknaden sin, bransjen dei opererer i, nøkkeltrendar og makroøkonomiske tilhøve. Nokre av dei identifiserte barrierane innomhus som kan hindre endringsprosessen, er det særleg den dominerande logikken, som kan skape kjernestivheit i korleis ein tenker om kva kjernesegmenta til verksemda er, som utpeikar seg. I tillegg ser vi at det er mangelfull leiarkunnskap, usikkerheit og kompleksitet samt fråvær av rutinar eller prosessar for forretningsmodellinnovasjon.